بْلادْ لَعْجَبْ
مْشات الانتخاباتْ وْجاتْ شَفْنا لَعْجَبْ بِعيْنينا بْلادْنا في لَكْريدي غَرْقاتْ الزْلَطْ وَصَل لَوَدْنينا صْنادَق عامْرا تَّقْباتْ وَحْنا عَمَّرْناها بيدِّينا لِجانْ كْثيرة تْشَكْلاتْ واخْبارْها ما تْلَقِّينا كْروش بالحْرام تْدَلَّاتْ ومن حْوايَجْنا تْعرِّينا كَتَّرو علينا لْمهراجاناتْ وبْنار لَغْلا تَشْوينا لا مَدارس لا صْبيطاراتْ وْلادْنا ضاعو لينا غَرْقو في الخير والامتيازاتْ الخبز النَّاشَف ما لْقينا زادوها بِلَݣْريماتْ وْلَهْراوة إلا دْوينا مشاريع كْثيرا تْحَطَّاتْ وْما شافَتْها عَيْنينا لَمْدُن بالزّْبَل عَمْراتْ وَرْوايَحْها لْخانْزا شَمِّينا أجسادْ بالحُݣْرا تْفَحّْماتْ وَعْلى فْراقْها بْكينا شُبَّان لِلْغُرْبة هَجْراتْ وَلَبْحر دّاهُمْ لينا بْناتْنا لِلْبَرّاني تَهْداتْ وَفْلوسْ لْعَرس عْلينا لَحزاب عْلينا تْفَلَّاتْ لْخَير لِيهم ماشي لِينا زيدْ عْليهُم النَّقاباتْ وَحْنا الله يْكون لينا التّْقة فيهم تْفَقْداتْ لَصْنادَقْهم لا وَلِّينا
بقلم: نورالدين فقري
ليست هناك تعليقات:
إرسال تعليق